Subah raato.n me.n bikhar jaatii hai,
shaam baaho.n me.n utar jaatii hai,

din sulag uThataa hai chandan kii tarah,
raat naagan sii lipaT jaatii hai,

[chandan = sandalwood; naagan (naagin) = snake]

kisii gumbad kii sadaa kii maanind,
fikr ko fikr hii doharaatii hai,

[gumbad = dome; sadaa = call]
[maanind =similar to; fikr = worry]

qaafile se mujhe rahne do alag,
bhiirh me.n ruuh bikhar jaatii hai,

[qaafilaa = caravan; bhii.D = crowd; ruuh = soul]

laajvantii hai kisii shoKh kii yaad,
dil bhii dharhke to simaT jaatii hai,

Dolii aa.Nkhon kii hai suunii "Hurmat",
niind mahbuub se sharmaatii hai.