Lete hii dil jo aashiq-e-dil-soz kaa chale, 
tum aag lene aaye the kyaa aaye kyaa chale, 

[dil-soz=pathetic] 

bal be Gharuur-e-husn, zamii.n par na rakhe paao.n, 
maani.nde aaftaab vo be naqashe paa chale, 

kyaa le chale galii se terii ham ke juu.n nasiim, 
aaye the sar pe Khaak u.Daane, u.Daa chale, 

aaluudaa chashm me.n na huii surmaa se nigaah, 
dekhaa, jahaa.N se saaf hii ahale safaa chale, 

[aaluudaa=impure; safaa= pure] 

saath apane le ke tausane umare ravaa.N ko aah, 
ham is saraaye dahar me.n kyaa aaye kyaa chale, 

[tausan=an unmanageable horse; dahar=world] 

fikare qanaayat unako mayassar huii kahaa.N, 
duniyaa se dil me.n le ke hirs-o-havaa chale ,

[qanaayat=contentment; mayassar=possible; hirs=greed] 

ai ‘Zauq' hai Ghazab nigaahe yaar, alhafeez! 
vo kyaa bache ke jis pe ye tiir-e-qazaa chale.