Apnii aag ko zindaa rakhnaa kitnaa mushkil hai
patthar biich aaiinaa rakhnaa kitnaa mushkil hai

kitnaa aasaan hai tasviir banaanaa auro’n kii
Khud ko pas-e-aaiinaa rakhanaa kitnaa mushkil hai

tumane mandir dekhe ho’nge ye meraa aangan hai
ek diyaa bhii jaltaa rakhnaa kitnaa mushkil hai

chullu me’n ho dard kaa dariyaa dhyaan me’n usake honth
yuu’n bhii khud ko pyaasaa rakhanaa kitnaa mushkil hai