کب پاؤں فِگار نہیں ہوتے، کب سر میں دُھول نہیں ہوتی
تیری راہ پہ چلنے والوں سے لیکن کبھی بُھول نہیں ہوتی

سرِ کوچہِ عشق آ پہنچے ہو لیکن ذرا دھیان رہے یہاں
کوئی نیکی کام نہیں آتی، کوئی دعا قبُول نہیں ہوتی

ہر چند اندیشہِ جاں ہے بہت، لیکن اس کارِ محبت میں
کوئی پل بیکار نہیں جاتا، کوئی بات فضُول نہیں ہوتی

تیرے وصل کی آس بدلتے ہوئے، تیرے ہجر کی آگ میں جلتے ہوئے
کب دل مصروف نہیں رہتا، کب جاں مشغُول نہیں ہوتی

ہر رنگِ جنوں بھرنے والو! شب بیداری کرنے والو
ہے عشق وہ مزدوری جس میں محنت وصُول نہیں ہوتی

جمال احسانی