|
* To vo kyaa hamko har ek jurm kii sazaa degaa *
To vo kyaa hamko har ek jurm kii sazaa degaa,
phir apne rahm-o-karam ka sabuut kyaa degaa,
maiN roz-e-hashr kaa qaayal huN phir bhi haNstaa huN,
ke ek bandaa Khudaa ko hisaab kyaa degaa,
hameN tumhaarii tarah shaiKh ilm-e-Ghaiib nahiiN,
na jaane kaun amal kisko bakshvaa degaa,
bas ek shoalaa jalaa tuu kisii sadaaqat kaa,
zamaana aap hii sadioN talak havaa degaa,
ham ek haiN mutaawaazii khutuut ho kar bhii,
judaa kiyaa hai azal ne, abad milaa degaa,
bas aaj ilm-e-bayaaN kaa kahiiN muqaam nahiiN,
jahaaN zubaan rukii meraa dil sadaa degaa.
|
|