Akhlaaq na bartenge mudaaraa na kare’nge 
Ab hm kisii shakhs kii paravaah na kare’nge 

Kuchh log kaii lafz ghalat bol rahe hai’n 
Isalaah magar ham bhii ab isalaah na kare’nge 

Kamgoii ke ek vasf-e-himaaqat hai bahar to 
Kamgoii ko apanaayenge chahakaa na kare’nge 

Ab sahal pasandii ko banaayenge vatiiraa 
Taa der kisii baab mei’n sochaa na kare’nge 

Gussaa bhii hai tahaziib-e-ta'lluq kaa talabgaar 
Ham chhup hai’n bahare baithe hai’n Gussaa na kare’nge 

Kal raat bahut ghaur kiyaa hai so ham ai "Jaun" 
Tay kar ke uThe hai’n ke tamannaa na kare’nge 

Har baar mere saamane aatii rahii ho tum 
Har baar tum se mil ke bichhadataa rahaa hoo’n mai’n

Tum kaun ho ye Khud bhii nahii’n jaantii ho tum 
Mai’n kaun hoo’n ye Khud bhii nahii’n jaantaa hoo’n mai’n

Tum mujh ko jaan kar hii padii ho aazaab mei’n 
Aur is tarah Khud apnii sazaa ban gayaa hoo’n mai’n

Tum jis zamii’n par ho mai’n us kaa Khudaa nahii’n 
Bas sar basar aziiyat-o-aazaar hii raho 

Bezaar ho gaii ho bahut zindagii se tum 
Jab bas mei’n kuchh nahii’n hai to bezaar hii raho

Tum ko yahaan ke saayaa-e-paratau se kyaa Gharaz 
Tum apne haq mei’n biich kii diivaar hii raho 

Main ibtadaa-e-ishq mei’n bemahar hii rahaa 
Tum intahaa-e-ishq kaa miyaar hii raho 

Tum Khuu’n thuukatii ho ye sun kar Khushii huii 
Is rang is adaa mei’n bhii purkaar hii raho 

Main ne ye kab kahaa thaa ke muhabbat mei’n hai najaat
Main ne ye kab kahaa thaa ke vafadaar hii raho 

Apanii mataa-e-naaz lutaa kar mere liye 
Baazaar-e-iltafaat mei’n naadaar hii raho 

Jab main tumhen nishaat-e-muhabbat na de sakaa 
Gham mei’n kabhii sukuun-e-rafaaqat na de sakaa 

Jab mere saare charaagh-e-tamannaa havaa ke hai’n 
Jab mere saare Khwaab kisii bevafaa ke hai’n 

Phir mujhe chaahane kaa tumhe’n koii haq nahii’n 
Tanhaa karaahne kaa tumhe’n koii haq nahii’n