Dil ne vahshat galii galii kar lii,
ab gilaa kyaa, bahut Khushii kar lii,
(vahshat : solitude; galii : lane; gilaa : complaint)
yaar, dil to balaa kaa thaa ayyaash,
us ne kis tarah Khud-kushii kar lii,
  
nahiiN aayeNge apne bas meN ham,
ham ne koshish rahii sahii kar lii,
ab to mujhko pasand aa jaao,
maiN ne Khud meN bohot kamii kar lii,
ye jo haalat hai apnii haalat-e-zaar,
ham ne Khud apne aap hii kar lii,
( zaar : groan)
ab kareN kis kii baat ham aaKhir,
ham ne to apnii baat bhii kar lii,
qaafilaa kab chale ga KhvaaboN kaa ,
ham ne ek aur niind bhii kar lii,
usko yaksar bhulaa diyaa phir se,
yaanii baat kii hu’ii kar lii,
aaj bhii raat bhar kii be-Khvaabii,
dil-e-bedaar ne kharii kar lii,
(be-Khvaabii : sleepless; kharii : balanced)
kyaa Khudaa us se dillagii kartaa,
ham ne to us se baat bhii kar lii.