Phirte hai’n kab se darbadar ab is nagar ab us nagar
ek duusare ke hamsafar mai’n aur merii aavaaragii

naa aashanaa har rahguzar naa meharbaan hai ek nazar
jaaye’n to ab jaayen kidhar mai’n aur merii aavaaragii

ham bhii kabhii aabaad the aise kahaan barbaad the
bifikr the aazaad the masaruur the dilshaad the

vo chaal aisi chal gayaa ham bujh gaye dil jal gayaa
nikale jalaa ke apanaa ghar main aur merii aavaaragii

vo maah-e-vash vo maah-e-ruuh vo maah-e-kaamil huubahuu
thiin jis kii baate’n kuubakuu us se ajab thii guftaguu

phir yuu’n huaa vo kho gaii aur mujh ko zid sii ho gaii
laayenge us ko dhoond kar mai’n aur merii aavaaragii

ye dil hii thaa jo sah gayaa vo baat aisii kah gayaa
kahne ko phir kyaa rah gayaa ashko’n kaa dariyaa bah gayaa

jab kah kar vo dilbar gayaa tee liye mai’n mar gayaa
rote hai’n us ko raat bhar mai’n aur merii aavaaragii

ab Gham uthaaye’n kis liye ye dil jalaaye’n kis liye
aansuu bahaaye’n kis liye yuu’n jaan gavaaye’n kis liye

peshaa na ho jis kaa sitam Dhuundenge ab aisaa sanam
honge kahii’n to kaargar mai’n aur merii aavaaragii

aasaar hai’n sab khot ke imkaan hai’n sab chot ke
ghar band hai’n sab kot ke ab khatm hai sab totake

qismat kaa sab ye khel hai andher hii andher hai
aise hue hain beasar ma’in aur merii aavaaragii

jab hamdam-o-hamraaz thaa tab aur hii andaaz thaa
ab soz hai tab saaz thaa ab sharm hai tab naaz thaa

ab mujh se ho to ho bhii kyaa hai saath vo to vo bhii kyaa
ek behunar ek besabar mai’n aur merii aavaaragii