|
* jaise ke jo bhii hu’aa, *
jaise ke jo bhii hu’aa,
uskaa ab tak yaqiiN isko aayaa nahiiN,
gehraa sannaaTaa hai,
ek ujRii dukaaN,
chiiKh ke baad muuNh,
jo khulaa kaa khulaa rah gayaa,
apne TuuTe kivaaRoN se vo,
duur tak phaile,
chuuRii ke TukRoN ko,
hasratzadaa nazroN se dekhtii hai,
ke kal tak yahii shiishe,
is pople ke muuNh meN,
sau rang ke daaNt the,
gehraa sannaaTaa hai,
(hasratzadaa : in anticipation)
gehre sannaaTe ne apne manzar se yuuN baat kii,
sun le ujRii dukaaN,
ai sulagte makaaN,
TuuTe Thele,
tumhiiN bas nahiiN ho akele,
yahaaN aur bhii haiN,
ham inkaa maatam kareNge,
magar pahle unko to ro leN
ke jo luuTne aaye the,
aur Khud luT gaye,
kyaa luTaa,
iskii unko Khabar hii nahiiN,
kamnazar haiN,
ke sadiyoN kii tehziib par,
un bechaaroN kii ko’ii nazar hii nahiiN.
|
|