Agar na zohraa jabiino.n ke daramiyaa.N guzre,
to phir ye kaise kaTe zindagii kahaa.N guzre,

jo tere aariz-o-gesuu ke darmiyaa.N guzre,
kabhii kabhii to vo lamhe.n balaa-e-jaa.N guzre,

mujhe ye vaham rahaa muddato.n ke jurrat-e-shauq,
kahii.n naa Khaatir-e-maasuum par giraa.N guzre,

har ik muqaam-e-mohabbat bahut hii dil-kash thaa,
magar ham ahal-e-mohabbat kashaa.N-kashaa.N guzre,

junuu.N ke saKht maraahil bhii terii yaad ke saath,
hasii.n hasii.n nazar aaye javaa.N javaa.N guzre,

merii nazar se terii justajuu ke sadqe me.n,
ye ik jahaa.N hii nahii.n saika.Do.n jahaa.N guzre,

hajuum-e-jalvaa me.n parvaaz-e-shauq kyaa kahnaa,
ke jaise ruuh sitaaro.n ke darmiyaa.N guzre,

Khataa mu'aaf zamaane se badgumaa.N hokar,
terii vafaa pe bhii kyaa kyaa hame.n gumaa.N guzre,

Khuluus jis me.n ho shaamil vo daur-e-ishq-o-havas,
naaraigaa.N kabhii guzaraa na raigaa.N guzre,

isii ko kahate hai.n jannat isii ko dozaKh bhii,
vo zindagii jo hasiino.n ke darmiyaa.N guzre,

bahut hasii.n sahii suhbate.n gulo.n kii magar,
vo zindagii hai jo kaa.NTo.n ke darmiyaa.N guzre,

mujhe thaa shikvaa-e-hijraa.N ki ye huaa mahsuus,
mere qariib se hokar vo naagahaa.N guzre,

bahut hasii.n manaazir bhii husn-e-fitrat ke,
na jaane aaj tabiiyat pe kyo.n giraa.N guzare,

meraa to farz chaman-ba.ndii-e-jahaa.N hai faqat,
merii balaa se bahaar aaye yaa Khizaa.N guzre,

kahaa.N kaa husn ki Khud ishq ko Khabar na hu_ii,
rah-e-talab me.n kuchh aise bhii imtahaa.N guzre,

bharii bahaar me.n taaraajii-e-chaman mat puuchh,
Khudaa kare na phir aa.Nkho.n se vo samaa.N guzre,

ko_ii na dekh sakaa jin ko do dilo.n ke sivaa,
mu'aamalaat kuchh aise bhii darmiyaa.N guzre,

kabhii kabhii to isii ek musht-e-Khaak ke gird,
tavaaf karte huye haft aasmaa.N guzre,

bahut aziiz hai mujh ko u.nhii.n kii yaad "Jigar",
vo haadsaat-e-mohabbat jo naagahaa.N guzre.