Tujhii se ibtadaa hai tuu hii ik din intahaa hogaa ,
sadaa-e-saaz hogii aur na saaz-e-be sadaa hogaa,

hame’n maaluum hai ham se suno mahashar me’n kyaa hogaa ,
sab us ko dekhate honge vo hamko dekhtaa hogaa,

sar-e-mahashar ham aise aasiyo’n kaa aur kyaa hogaa ,
dar-e-jannat na vaa hogaa dar-e-rahamat to vaa hogaa,

jahannum ho ki jannat jo bhii hogaa faisalaa hogaa ,
ye kyaa kam hai hamaaraa aur us kaa saamanaa hogaa,

azal ho ya abad,dono’n aseere zulfe hazrat hai’n,
jidhar nazre’n uthayoge, yehi ik silsila hoga,

ba nisbat ishq ki be rang laye rah nahi sakti,
jo mahboobe khoda(S.A.W.) hoga woh mahboobe khoda (S.A.W.) hoga,

isi ummeed per ham talbaane dard jeete hai’n
khusha darde ! ke tera dard, dared la dawa hoga,

nigaah-e-qahar par hii jaan-o-dil sab khoye baiThaa hai 
nigaah-e-mehar aashiq par agar hogii to kyaa hogaa

yeh maanaa bhej degaa ham ko mahashar se jahannum men 
magar jo dil pe guzaregii vo dil hii jaanataa hogaa

samajhataa kyaa hai tuu diivaanaagaanaa-e-ishq ko zaahid 
ye ho jaayenge jis jaanib usii jaanib Khudaa hogaa

"Jigar" kaa haath hogaa hashr me’n aur daaman-e-hazarat 
shikaayat ho ki shikavaa jo bhii hogaa baramalaa hogaa