Jab bhii chuum letaa huN un hasiiN aaNkhoN ko,
sau chiraaGh andhere meN jhilmilaane lagte haiN,
Khushk Khushk hoNTon meN jaise dil kheNch aataa hai,
dil meN kitne aa’iine TharTharaane lagte haiN,
phuul kyaa, shiGhuufe kyaa, chaaNd kyaa, sitaare kyaa,
sab raqiib qadmoN par sar jhukaane lagte haiN,
zehn jaag uThtaa hai, ruuh jaag uThtii hai,
naqsh aadmiyaat ke jagmagaane lagte haiN,
lau nikalne lagtii hai mandiroN ke siine se,
devtaa fazaaoN meN muskuraane lagte haiN,
(shiGhuufe : blossoms; raqiib : competitor;  naqsh : foot-prints)
raqs karne lagtii haiN muurateN Ajanta kii,
muddatoN ke lab-bastaa Gaar gaane lagte haiN,
phuul khilne lagte haiN ujRe ujRe gulshan meN,
tishnaa-tishnaa getii (?) par abr chhaane lagte haiN,
lamha bhar ko ye duniyaa zulm chhoR detii hai,
lamhaa bhar ko sab patthar muskuraane lagte haiN,
(raqs : dance; Ajanta : Caves in India famous for murals; Gaar : cave; tishnaa : thirsty)