Rukh me.n gard-e-malaal thi kya thi, 
haasil-e-maah-o-saal thi kya thi.

eik soorat si yaad hai ab bhii, 
aap apnii misaal thi kya thi. 

mere jaanib uthii thi koyi nigaah, 
eik mub_ham sawaal thi kya thi. 

us ko paakar bhii us ko paa na sakaa, 
justajoo-e-jamaal thi kya thi. 

dil me.n thi par labo.n tak aa na sakii, 
aarazoo-e-visaal thi kya thi. 

umr bhar me.n bas eik baar aayii ,
sa'at-e-laazavaal thi kya thi. 

koyi khvaahaaN na tha ki jins-e-hunar, 
eik muflis ka maal thi kya thi.