Ye misraa nahiiN hai, vaziifaa meraa hai,
Khudaa hai muhabbat, muhabbat Khudaa hai,
kahuuN kis tarah maiN ke vo bevafaa hai,
mujhe uskii majbuurioN kaa pataa hai,
havaa ko bahut sarkashii kaa nashaa hai,
magar ye na bhuule, diyaa bhi diyaa hai,
main usse judaa huN, vo mujhse judaa hai,
muhabbat ke maaroN ka fazl-e-Khudaa hai,
nazar meN hai jalte makaanoN ka manzar,
chamakte hain jugnuu to dil kaaNptaa hai,
unheN bhuulna yaa unheN yaad karnaa,
vo bicchRe hain jabse yahii mashgalaa hai,
guzartaa hai har shakhs chehraa chupaaye,
ko’ii raah mein aaiinaa rakh gayaa hai,
kahaaN tu “Khumar” aur kahaaN kufr-e-taubaa,
tujhe paarsaaoN ne bahkaa diyaa hai