* dekhta rehta hooN khud ko raaigaN hotey huye *
Waqt kay hamraah saansoN ka ziaN hotey huye
dekhta rehta hooN khud ko raaigaN hotey huye
jaanta hooN karb meiN bujhtey huye ehsaas ka
meney dekha hai SharaaroN ko dhuaN hotey huye
kis Qadar bad-rang tuney apna zaahir kar liya
aur meiN khush-rang hooN khud mein nihaN hotey huye
do jazeeroN mein theiN baaham raat yeh sargoshiaN
muztarib hai kyuN samandar be-karaaN hotey huye?
meiN zabaaN rakhtey huye bhi kis qadar khaamosh hooN
ghul macha deti haiN aankheiN be-zabaaN hotey huye
miharbaN ik saaye ney awaaz dey kar yeh kaha
bheegta hai dhoop mein kyuN SaaibaN hotey huye?
meiN zameeN ho kar bhi janey kis nashey mein choor tha?
munkasir tha kis qadar woh AasmaN hotey huye
ansuna sa kar diya unko safar kay shauq ney
dil mein andeishey they jo ghar sey rawaaN hotey huye
;Shaad; yeh maazi sey ley kar haal tak ka hai safar
zakhm ko barsoN lagey haiN ik NishaN hotey huye
****** |