بس گئے آنکھوں میں انگار خدا خیر کرے
ظلم کی سانسوں میں انوار خدا خیر کرے
پھِر فضا جاگ اُٹھی تاروں نے رَستہ بدلا
ظلمتیں ہو گئیں مسِمار خدا خیر کرے
جہل کے سارے ہی موسم تھے خِرد کی صورت
آگہی ہو گئی ہشیار خدا خیر کرے
موسمِ عشق نے پہنی ہے خِرد کی پوشاک
پھر جنوں ہو گیا لاچار خدا خیر کرے
مُجرمِ عشق ہوں میں ، مجھ سے عداوت توبہ
آندھیوں نے کیا اقرار خدا خیر کرے
مجھ کو طُوفانِ بلاخیز کا ڈر کیا ہو گا
مری موجوں سے ہے تکرار خدا خیر کرے
کہکشاں آنکھوں کے رستے اُتر آئی دل میں
آبلہ پائی ہوئی خوار خدا خیر کرے
اپنی ہی راکھ سے میں نے تھے نکالے گوہر
پتھروں کے لگے انبار خدا خیر کرے
آرزئوں کے چراغوں سے جَسارت لے کر
ظلمتوں نے کیا انکار خدا خیر کرے
مِری آنکھوں میں چھُپی سیپیاں پانے کے لیے
ساحلوں پر سجے اخگار خدا خیر کرے
خارزاروں نے کھِلائے جو مرادوں کے کنولؔ
وہ ہیں خوشبو کے طلبگار خدا خیر کرے
***********
