Bikharate Tootate lamho’n ko apanaa hamsafar jaanaa
thaa is raah men aakhir hamen Khud bhii bikhar jaanaa

havaa ke dosh par baadal ke Tukade kii tarah ham hain
kisii jhonke se puuchhenge ki hai ham ko kidhar jaanaa

mere jalate hue ghar kii nishaanii bas yahii hogii
jahaan is shahar me’n raushanii dekho Thahar jaanaa

pas-e-zulmat koii suuraj hamaaraa muntazir hogaa
isii ek vaham ko ham ne chiraagh-e-rahguzar jaanaa

dayaar-e-Khaamashii se koii rah-rah kar bulaataa hai
hame’n "Makhmoor" ek din hai isii aavaaz par jaanaa