* Jis ne jhela hi nahiN ho kabhi dushnaam ka dukh *
Jis ne jhela hi nahiN ho kabhi dushnaam ka dukh
Woh samajh paae ga kaese dil e nakaam ka dukh
Jis ghadi bichda tha woh mujh se hamesha ke liye
Bhool paya nahiN maeN aaj bhi us shaam ka dukh
Log aaraam ki khatir haeN zamaane meN dukhi
Aur hotaa rahaa mujh ko sada arram ka dukh
Tez raftaar zamaane ka yeh qissa hae ke ab
KahiN bekaari ka shikwaa to kahiN kaam ka dukh
Tod kar rind ne pheNkaa jo sar e mae khaanaa
Ab bhi saaqi ko hae us toote hue jam ka dukh
Hum nawaa ho gae basti maeN sabhi raawan ke
Kis ko fursat hae ke pooche koi ab Raam ka dukh
Eik din josh e junooN meN jo udhar jaa nikla
Tab samajh payaa kahiN koochah e badnaam ka dukh
|