Shikwa karu'n mai'n kab tak us apne meharba'n ka,
al-qissa rafta rafta dushman hua hai jaa'n ka,

di aag rang-e-gul ne wa'n ai saba chaman ko,
ya'n ham jale qafas mei'n sun hal ashiya'n ka,

har subah mere sar par ik hadisa naya hai,
paiwand ho zami'n ka, shewa is aasma'n ka,

kam-fursati jaha'n ke majma ki kuchh na puchho,
ahwal kya kahu'n mai'n, is majlis-e-rawa'n ka,

ya roye, ya rulaye, apni to yu'n hi guzari,
kya zikr ham safira'n yaran-e-shadma'n ka,

qaid-e-qafas mei'n hai'n to khidmat hai naligi ki,
gulashan mei'n the to ham ko mansab tha rauzakhwa'n ka,

puchho to 'Mir' se kya koi nazar para hai,
chehra utar raha hai kuch aaj us jawa'n ka.