غزل

٭……میر تقی میر

بات کیا آدمی کی بَن آئی
آسماں سے زمین نپوائی
چرخ زن اُس کے واسطے ہے مدام
ہو گیا دن تمام رات آئی
ماہ و خورشید و ابرو باد سبھی
اس کی خاطر ہوئے ہیں سودائی
کیسے کیسے کئے تردد جب
رنگ رنگ اس کو چیز پہنچائی
اس کو ترجیح سب کے اوپر دے
لطفِ حق نے کی عزت افزائی
حیرت آتی ہے اس کی باتیں دیکھ
خود سری، خود ستائی، خود رائی
شکر کے سجدوں میں یہ واجب تھا
یہ بھی کرتا سدا جبیں سائی
سو تو اس کی طبیعتِ سرکش
سر نہ لائی فرو، کہ ٹک لائی
میرؔ نا چیز، مشتِ خاک ، اللہ
اُن نے یہ کبریا کہاں پائی