* Ibtidaa-e-ishq hai rotaa hai kyaa *
Ibtidaa-e-ishq hai rotaa hai kyaa
aage aage dekhiye hotaa hai kyaa
qaafile men subah ke ik shor hai
yaani Ghaafil ham chale sotaa hai kyaa
sabz hotii hii nahiin ye sarzamiin
tukhm-e-Khvaahish dil men tuu botaa hai kyaa
ye nishaan-e-ishq hain jaate nahii’n
daagh chhaatii ke abas dhotaa hai kyaa
Ghairat-e-yusuf hai ye vaqt-e-aziiz
'Meer' is ko raayegaa’n khotaa hai kyaa
|