Rubaiyat

جھٹپٹا وقت ٹھنڈی ٹھنڈی ہوا 
آسماں پر خرام بادل کا 
جان و دل کو خرید لیتی ہے 
ایسے عالم میں بانسری کی صدا 
-

جب جہاں محو خواب ہوتا ہے 
بچ کر عقل و ہوش سوتا ہے 
موت دنیا پہ دیکھ کر طاری 
میں بھی روتا ہوں، دل بھی روتا ہے 
-

شب کی تاریکیوں میں گم ہے جہاں 
حکمراں ہر طرف ہے خواب گراں 
میری آنکھیں لگی ہیں تاروں سے 
یہ بھی میری طرح ہے سوز بجاں 
-

ہے مخالف اگر جہاں، پھر کیا 
تیغ برسر ہے آسماں، پھر کیا 
پاؤں میرے نہ ڈگمگایں گے
سخت مشکل ہے امتحاں، پھر کیا
-

داستان الم سنا دونگا
داغ ہاۓ جگر دکھا دونگا 
وقت کا انتظار ہے مجھکو 
پردۂ راز خود اٹھا دونگا
-

اپنی دھن ہی میں مست رہنے دو 
زحمت اضطراب سہنے دو 
میرے بارے میں دوستو! تم سے 
کوئی کہتا ہے کچھ تو کہنے دو 
-

شمع احساس جلتی رہتی ہے 
آگ دل میں ابلتی رہتی ہے 
لب پر آتا نہیں مگر شکوہ 
چپکے چپکے پگھلتی رہتی ہے 
-

رات اف کس قدر ہے ظلمت کوش 
ہیبت افزا، ڈراؤنی، خاموش 
دور اس وقت گا رہا ہے کوئی 
میں سراپا بنا ہوا ہوں گوش 
-

تجربہ ایک بار کر دیکھو 
دل کو بے اختیار کر دیکھو 
مجھ سے کیا پوچھتے ہو حال فراق
ایک بار انتظار کر دیکھو
-

زندگی نزر جام الفت ہے 
یہ بھی مل جاۓ تو غنیمت ہے 
عشرت جان و دل سمجھ اسکو 
ورنہ دنیا نہیں، مصیبت ہے 
****