Main apne aap se huun mahav e guftagoo ab tak
Meraa hii cheharaa hai bas mere roobaroo ab tak
Na haath jaamaadarii se uthaae vahshat ne
Na apnaa chaak e garebaan huaa rafoo ab tak
Jamood e kuhnagii e khumkadaa, arey tobaa!
Vahii hai rind, vahi mai, vahi suboo ab tak
Huaa zamaanaa ki dam bhar ko barq chamkii thii
Kaleem o tuur kii baqii hai guftagoo ab tak
Hanooz mere ta’aaqqub men hai gham e duniya
Huii hai khatm kahaan merii justajoo ab tak
Hujoom e yaas ne koshish to kii, magar na chhutaa
Khizaan ke haath se daamaan e aarzoo ab tak
Ye kis bagoole ke chakkar men hai dil e naadaan
Kharaab e dast ba unwaan e justajoo ab tak
Jafaa o zulm kaa ab apne jayazaa kar le
Na pooch mujh se, wafaa kyuun hai merii khoo ab tak
Hazaaron saal se dhadkan huun tere dil kii magar
Samajh rahaa hai mujhe ajanabii hii tuu ab tak
Badal chukaa hai zamaanaa magar “Zia” sahib
Na badalaa aapkaa andaaz e guftagoo ab tak 
***************