* Ishq mujhako nahii’n vahashat hii sahii *
Ishq mujhako nahii’n vahashat hii sahii
merii vahashat terii shoharat hii sahii
qataa kiije na ta'alluq ham se
kuchh nahii’n hai to adaavat hii sahii
mere hone me.n hai kyaa rusvaaii
ye vo majalis nahii’n khalvat hii sahii
ham bhii dushman to nahii’n hai’n apane
Ghair ko tujh se mohabbat hii sahii
apanii hastii hii se ho jo kuchh ho
aagahii gar nahii’n ghafalat hii sahii
umr har chand ke hai barq-e-khiraam
dil ke Khuun karne kii fursat hii sahii
ham koii tarq-e-vafaa karte hai’n
na sahii ishq musiibat hii sahii
kuchh to de ai falak-e-nainsaaf
aah-o-fariyaad kii ruKhasat hii sahii
ham bhii tasliim kii khuu daalenge
beniyaazii terii aadat hii sahii
yaar se chhedaa chalii jaaye "Asad"
gar nahii’n vasl to hasarat hii sahii
|