* مدت ہوئی ہے یار کو مہماں کئے ہوئے *
غزل
٭……اسد اللہ خاں غالب
مدت ہوئی ہے یار کو مہماں کئے ہوئے
جوشِ قدح سے بزمِ چراغاں کئے ہوئے
کرتا ہوں جمع پھر، جگرِ لخت لخت کو
عرصہ ہوا ہے دعوتِ مژگاں کئے ہوئے
پھر وضع احتیاط سے رُکنے لگا ہے دم
برسوں ہوئے ہیں چاک گریباں کئے ہوئے
پھر پرسشِ جراحت دل کو چلا ہے عشق
سامان صد ہزار نمکداں کئے ہوئے
پھر بھر رہا ہے خامۂ مژگاں بخونِ دل
سازِ چمن طرازیٔ و اماں کئے ہوئے
دل پھر طواف کوئے ملامت کو جائے ہے
پندار کا صنم کدہ ویراں کئے ہوئے
پھر شوق کر رہا ہے خریدار کی طلب
عرضِ متاعِ عقل و دل و جاں کئے ہوئے
پھر چاہتا ہوں نامۂ دلدار کھولنا
جاں نذرِ دلفریبیٔ عنواں کئے ہوئے
|