* جب یار نے اٹھاکر زلفوں کے بال باند *
غزل
٭………مرزا محمد رفیع سودؔا
جب یار نے اٹھاکر زلفوں کے بال باندھے
تب میں نے اپنے دل میں لاکھوں خیال باندھے
دو دن میں ہم تو یہ ریجھے، اے وائے حال ان کا
گذرے ہیں جن کے دل کو یاں ماہ و سال باندھے
تارِ نگہ میں اس کے کیونکر پھنسے نہ یہ دل
آنکھوں نے جس کی لاکھوں وحشی غزال باندھے
بوسے کی ہے تو خواہش پر کہئے کیوں کہ اس سے
جس کے مزاجِ لب پر حرفِ سوال باندھے
مارو گے کس کو جی سے کس پر کمر کسی ہے
پھرتے ہوکیوں پیارے تلوار ڈھال باندھے
دو چار شعر آگے اس کے پڑھے تو بولا
مضموں یہ تو نے اپنے کیا حسبِ حال باندھے
سوداؔ جو ان نے باندھا زلفوں میں دل سزا ہے
شعروں میں اس کے تونے کیوں خط و خال باندھے
******* |