Mile Gham se apane fursat to sunaauun vo fasaanaa
ki Tapak pade nazar se may-e-ishrat-e-shabaanaa

yahii zindagii musiibat yahii zindagii musarrat 
yahii zindagii haqiiqat yahii zindagii fasaanaa

kabhii dard kii tamannaa kabhii koshish-e-madaavaa 
kabhii bijaliyon kii Khvaahish kabhii fiqr-e-aashiyaanaa

mere kahakahon ke zad par kabhii gardishen jahaan kii 
mere aansuuon kii rau men kabhii talkhii-e-zamaanaa

kabhii main huun tujhase naalaa kabhii mujhase tuu pareshaan
kabhii main teraa hadaf huun kabhii tuu meraa nishaanaa

jise paa sakaa na zaahid jise chhuu sakaa na suufii 
vahii tiir chhedataa hai meraa soz-e-shaayaraanaa