آئے جو اس کے گھر سے وہ پتھر سمیٹ لوں
کچھ ٹھہر تو سہی کہ تحیّر سمیٹ لوں

کشمیر! پُر جمال تصوّر سمیٹ لوں؟
آنکھوں سے اپنی سب یہ مناظر سمیٹ لوں

اس شہر میں خِرَد کا خریدار ہی نہیں
سوچا ہے یاں سے جنس ِتدبّر سمیٹ لوں

تجھ سنگ کائنات مسخّر کروں گا میں
بس نیند سے اٹھوں ،ذرابستر سمیٹ لوں

انسان ہوں، خدا نے عطا کیں وہ وسعتیں
آنکھوں ہی میں بہت سےسمندر سمیٹ لوں

مجھ کو عیار عمروکی زنبیل جو ملے
دھرتی کےشر پسند عناصر سمیٹ لوں

عزمِ سفر کیا تو چلیں تیز آندھیاں
مطلب کہ اپنے پھیلے ہوئے پر سمیٹ لوں

قندیل ؔ کیوں نہ صاف کروں دل کا آئنہ
چبھتے جو اس میں ہیں سبھی کنکر سمیٹ لوں

******************