TOD HI DAALA KHUDA NE AB KE MODI KA GHUROOR
DOSTO, ISHRAT JAHA'N SAABIT HUI HAI BEQUSOOR
DEKHNA HAI YE SITAARE RANG KYA DIKHLAAENGE
KYA BAHAANA AB KE APNE REHNUMA FARMAAENGE
KIS TARAH AB KE HAMAARE ZAKHM YE SEHLAAENGE
KYA KAHA? INSAAF YE MAQTOOL KO DILWAAENGE?
 
WAH WA ! KYA KHOOB HAIN IN KI KARAM FARMAAIYAA'N
KYA ADAA E LUTF HAI, KYA KHOOB ANDAAZ E BAYAA'N 
WAQT KO MAAZI ME'N LEKIN LE KE JAA SAKTE HAIN KYA?
JAAN YE ISHRAT JAHAN KI PHIR DILAA SAKTE HAIN KYA?
KHOI HAI IK MAA'N NE BETI, WO BHI LAUTAAENGE KYA?
ZULM KE YE DEWTA INSAAF FARMAAENGE KYA
 
ZULM KE KAALE HUNAR KI BAANGI TO DEKHIYE
RAKSHAKO'N KI APNE YE MARDAANGI TO DEKHIYE
EK ABLA, BEBAS O LAACHAAR PAR KARTE HAIN WAAR
KYA KARENGE YE BHALA DEHSHAT KE DAANAV KA SHIKAAR
AAJ INSAANI LAHOO SE KIS KA DAAMAN SAAF HAI
MAAR DO BEMAUT JIS KO CHAAHO! KYA INSAAF HAI
REHNUMAAO! JAA'N HAMAARI ITNI SASTI? KISLIYE?
GHAR JALAANE WALO'N KI YE SARPARASTI KIS LIYE?
 
DAAR PAR INSAANIYAT KO TAANGNE WALON SE TUM
POOCHH LENA VOTE AB KE MAANGNE WALON SE TUM
HAM TUMHARE WASTE SHATRANJ KI IK GOT HAIN
HAI'N KAHA'N INSAAN AAKHIR, HAM TO BAS IK VOTE HAI'N
 
CHAL RAHA HAI KAB SE BEINSAAFIYO'N KA SILSILA
APNI IN BADBAKHTIYO'N KA HAM KARE'N KIS SE GILA
NAFRATE'N, DHOKA, HIQAARAT APNA SARMAAYA RAHA
HAM JO MARTE HAI'N TO MAR JAAE'N, TUMHE'N IS SE HAI KYA
***********************