SAARI WAHSHAT, HAR TADAP KO AB TARASTA CHHOD DOO'N
AB AZAABO'N KA YE SEHRA YU'N HI JALTA CHHOD DOO'N
 
SAARE AALAM ME'N YU'N HI IK HASHR BARPAA CHHOD DOON
MERI WAHSHAT KA TAQAAZA HAI KE DUNIYA CHHOD DOON
 
JEE ME'N AATA HAI MITAA DAALOON MUQADDAR KA NIZAAM
HAR TAMANNA HAR KHUSHI HAR GHAM KO TANHAA CHHOD DOON
 
APNE HAATHO'N KI LAKEERE'N TO MITA DAALOO'N MAGAR
DIL KE HAR TUKDE PE KOI NAAM LIKKHA CHHOD DOO'N
 
BHARTE BHARTE BAARHAA PHIR NOCH DAALA HAI TO PHIR
AB TO DIL KE ZAKHM KO MAIN YU'N HI TAAZA CHHOD DOO'N
 
MAI'N HOO'N IK ZAKHMEE TAMANNA MAI'N TAMANNA KA SARAAB
RET KE HAR EK ZARRE KO MAI'N PYAASA CHHOD DOO'N
 
AAJ TAK DIL KA LAHOO DE KAR SANWAARA HAI JISE
KAISE US TASWEER ME'N AB RANG BHARNA CHHOD DOO'N
 
KAAT DOO'N KHUD PAAON APNE NOCH DAALOO'N SAARE PAR
AUR FAZAA ME'N UN PARO'N KO YU'N HI UDTA CHHOD  DOO'N
 
HALQAA E MAAZI SE AB BAAHAR NIKALNA HAI MUJHE
AARZOO KI LAASH SE YAADO'N KO LIPTAA CHHOD DOO'N
 
IK NAYE ANDAAZ SE CHAL DOO'N NAI IK RAAH PAR
AUR HAR HASRAT KO PEECHHE RAFTAA RAFTAA CHHOD DOO'N
 
IK NAI TAAREEKH LIKHNI HAI MUJHE 'MUMTAZ' PHIR
HAR MOHABBAT KE WARAQ KO AAJ SAADA CHHOD DOON
****************