EID E AZHAA PAR QAREEB AAI JO QURBAANI KI RAAT
CHALTE CHALTE EK BAKRA KEH GAYA MUJH SE YE BAAT
EID YE PAIGHAAM LE KAR AAI HAI,   HAJ KIJIYE
AAJ APNI KHAAMIYON KO AAP KHUD JUDGE KIJIYE
 
ZIBH KIJE MUJH KO YUN SHAAN E MUSALMAANI KE SAATH
ZIBH HO JAAE NA KHUD MAQSAD BHI QURBAANI KE SAATH
MUJH KO QURBAA.N KAR KE YE POOCHHE NA AAINDAA KOI
AYE AZIZO! MERE HISSE KI KALEJI KYA HUI
EK SAAHAB GHAR MERI IK RAAN POORI LE GAE
KHAAL BAAQI THI, SO MISRI KHAN POORI LE GAE
 
KITNI BEJAA BAAT HAI,  MERE KHAREEDAR E AZIZ 
ZIBH KAR KE GOSHT KAR LETE HAIN DIBBO.N MEN FREEZ
AAP SE YE DAST O PAA BASTA GUZAARISH HAI MERI
GOSHT JO MERA BACHE TAQSEEM KAR DIJE FREE
 
LAB PE QURBAANI KI NEEYAT, DIL MEN KHUSHBOO E KABAAB
AYE MAIN SADQE!  IS KO QURBANI NAHIN KEHTE JANAAB
MERI QURBANI WASEELA HAI ITAA'AT KE LIYE
IS KI SHOHRAT KYUN HO SIRF APNI ISHAA'AT KE LIYE
 
AISI QURBANI SE KYA KHUSH HOGA WO RABB E JALEEL
RASM E QURBAANI HAI BAAQI, UTH GAYA ISHQ E KHALEEL
GAAMZAN WO SHAKHS HAI ALLAH KE EHKAAM PAR
JIS NE MUJH KO KAR DIYA QURBAA.N KHUDA KE NAAM PAR
 
AAP SE MUJH KO SHIKAAYAT HAI KE QURBANI KE SAATH
GOSHT KAISA, POST PAR BHI SAAF KAR DETE HAIN HAATH
MAIN TO KEHTA HOON KE QURBAANI MERI ANMOL HO
AAP KEHTE HAIN KE BIRYAANI MEN BOTI GOL HO
 
BARF KHAANO.N MEN JO MERE GOSHT KA STALL HAI
YE TO QURBANI NAHIN HAI, MERA ISTEHSAAL HAI
MERA SAR, MERI ZUBAA.N, MERI KALEJI, MERE PAAE
SAB GHAREEBO.N KO DIYE JAAEN YAHI HAI MERI RAAE
 
MERA GURDA US KA HISSA HAI JO KHUD BEGURDA HO
MERA DIL US KE LIYE HAI JIS KA DIL AFSURDA HO
EID KEHTI HAI BADHAAO HAUSLE EHBAAB KE
AAP KHICHDA KHAAE JAATE HAIN SHIKAM KO DAAB KE
 
FARZ E QURBANI KA MAQSAD JAZBAA E EESAAR HAI
AAP KEHTE HAIN, KE YE DUMBA BAHOT TAYYAR HAI
AAP  MEDE KI DIPO MEN EID KA KOTA LIYE
SOO E SEHRA JAA RAHE HAIN HAATH MEN LOTA LIYE
 
GHAIR ISLAMI AGAR HAI, JO CHHURI MUJH PAR GIRI
MERI QURBANI NAHIN HAI, YE HALAAKAT HAI MERI
MAR GAYA MAIN, AAP KO KHAANE KI AASANI HUI
IS KO QURBAANI KAHA JAAE ?  YE QURBANI HUI ?
***********************