HAM NE APNE BAAM O DAR IS LIYE SAJAAEY HAIN
RAUNAQON KE DAAMAN MEN SAARE GHAM CHHUPAAEY HAIN
 
HAUSLE MUQADDAR KE KHOOB AAZMAAEY HAIN
CHUPKE CHUPKE KUCHH LAMHE WAQT SE CHURAAEY HAIN
 
BEREHEM HAQEEQAT NE JAB BHI APNE PAR TOLE
ZEHN KI ZAMEE.N PAR KUCHH KHWAAB JHILMILAAEY HAIN
 
KOI SHAR KOI SAAZISH HAM SE BACH NAHIN SAKTI
WAQT KI RAWISH PAR BHI HAM NAZAR JAMAAEY HAIN
 
IN MEN KAL HQEEQAT KE PHAL ZAROOR AAEYNGE
AAJ HAM NE KHWAABON KE PED JO LAGAAEY HAIN
 
AANE WALI NASLON KI REHNUMAAI KI KHAATIR
RAASTON PE KUCHH HAM NE NAQSH BHI BANAAEY HAIN
 
MAZMARAAT E HASTI SE YE KASHISH MILI HAM KO
JAANE KITNE AFSAANE DIL MEN HAM DABAAEY HAIN
 
KAUN SI QAYAAMAT YE AAJ IN PE TOOTI HAI
HASRATEN YE KYUN SAR PE AASMAA.N UTHAAEY HAIN
 
YE NAHIN KE KHUSHIYAAN HI JASHN YE MANAATI HON
JAB BAHAAR AAI HAI GHAM BHI MUSKRAAEY HAIN
 
SIRF APNA HAQ HI TO HAM NE BAS NAHIN CHHEENA
HAM NE APNE RISHTON KE QARZ BHI CHUKAAEY HAIN
 
JURM KUCHH NA KUCHH IS MEN HAI HAMAARA BHI SAAHAB
HAM NE JAAN KAR BHI TO KUCHH FAREB KHAAEY HAIN
 
GUFTGU MEN JUMLON SE KHEL HAM NAHIN KARTE
HAM PIRO KE LAFZON MEN INQILAAB LAAEY HAIN
 
KITNE KHWAAB MAAZI KE MIL KE RO PADE HAM SE
JUSTJU PEHEN KAR HAM JAB BHI GHAR TAK AAEY HAIN
 
RAAT KI KHAMOSHI MEN KITNA SHOR HAI "NAZA"
HAM HAIN AUR MAAZI KE JHILMILAATE SAAEY HAIN
***********************