HAUSLE KA LE KE TESHA BEBASI PAR WAAR KAR
APNI HAR MANZIL KI KHAATIR RAASTA HAMWAAR KAR
 
KHO KE BEHR E MAUJZAN MEN KHUD BHI HO JA BEKARAAn
JEET LE ULFAT KI BAAZI TU KHUDI KO HAAR KAR
 
HAI TAQAAZA WAQT KA UTTHE NAYA IK INQELAAB
TU ZAMEER E KHWAABZAN KO AAJ TO BEDAAR KAR
 
MAJMA E AGHYAAR MEN KHOYA RAHEGA KAB TALAK
MUNFARID HAI TU TO PHIR APNA JUDAA ME'YAAR KAR
 
TAAR HAI DAAMAN BHI TERA, KHO DIYA PINDAAR BHI
KYA TUJHE HAASIL HUA APNI ANAA KO MAAR KAR
 
ZULM KE REG E RAWAAN MEN NOOR KI BAARISH BHI LAA
HAI MOHABBAT IK KHATAA TO YE KHATAA HAR BAAR KAR
 
KHAUF KE IS SAAYBAAn SE TO BHALI HAI WO TAPISH
JEENA HAI TO MAUT SE KHUL KAR NIGAAHEN CHAAR KAR
 
APNI HASTI KO MITAA DE MARZI E MAASHOOQ PAR
AASHIQI KE NOOR SE AARAAISH E KIRDAAR KAR
 
IS QADAR HAI AAM AB CHEHRE BADALNE KA HUNAR
ZINDAGI BHI MIL RAHI HAI ROOP KITNE DHAAR KAR
 
MANZILEN 'MUMTAZ' KHUD CHOOMENGI BADH KAR TERE PAANV
WAQT KE KOH E GARAAn KO MASLEHAT SE PAAR KAR
***************************