HAWA KE RAQS SE PAANI KE SAAE TOOT JAATE HAIN
HAQEEQAT KI ZAMEE.N PE GIR KE SAPNE TOOT JAATE HAIN
 
BALANDI ROZ TO MILTI NAHIN FUNKAAR KE FUN KO
KOI SHEHKAAR BANTA HAI TO SAANCHE TOOT JAATE HAIN
 
TARASHA KARTA HAI KHILWAT MEN ZEHN E BEKARAA.N JIN KO
TASAWWAR KE WO PAIKAR GAAHE GAAHE TOOT JAATE HAIN
 
HON KITNE BHI SUNEHRE KHWAAB TO PHIR KHWAAB HOTE HAIN
KE ZARB E MASLEHAT SE SAARE VAADE TOOT JAATE HAIN
 
TADAPTI HAI JO WAHSHAT BEDIYAA.N JAB CHEEKH UTHTI HAIN
DAR E ZINDAAN KE PHIR SAARE QABZE TOOT JAATE HAIN
 
IRAADO.N KE PARON PAR HASRATEN PARWAAZ KARTI HAIN
JUNOO.N JAB RAQS KARTA HAI SITAARE TOOT JAATE HAIN
 
SHIKASTO.N MEN HAMESHA JEET BHI POSHEEDA HOTI HAI
HAMAARI MAAT HOTI HAI TO PAANSE TOOT JAATE HAIN
 
GUZAR JAATA HAI JO IK BAAR WO YAADO.N KI GALIYO.N SE
TO MAAZI KI SABHI PARTO.N KE TAANKE TOOT JAATE HAIN
 
MOHABBAT MEN BANAAVAT KI JAGAH HOTI NAHIN SAAHAB
TASANNOA SE SABHI 'MUMTAZ' RISHTE TOOT JAATE HAIN
******************