DAM BA DAM KHAUL RAHA HAI MUJH MEN
EK LAAVA SA DABAA HAI MUJH MEN
 
AB BHI HAIN CHAND DHADKANEN DIL MEN
AB BHI IK KHWAAB BACHAA HAI MUJH MEN
 
TOOT JAAE NA ZABT KI YE FASEEL
KOI TOOFAA.N SA RUKA HAI MUJH MEN
 
RANG BIKHRE HUE HAIN DOOR TALAK
KUCHH TO HAI, KUCHH TO KHILA HAI MUJH MEN
 
SHOLA REZON SE KHELNA CHAAHE
EK BACHCHA JO CHHUPA HAI MUJH MEN
 
SAB MITA JAATA HAI RAFTA RAFTA
JAANE KAISI YE WABAA HAI MUJH MEN
 
JAL RAHA HAI WAJOOD MUDDAT SE
EK MEHSHAR SA BAPA HAI MUJH MEN
 
KITNA VEERAAN HAI DIL KA MANZAR
"KOI AAHAT NA SADAA HAI MUJH MEN"
 
GIR KE TOOTA HAI EK KHWAAB ABHI
IK CHHANAAKA SA HUA HAI MUJH MEN
 
MUNTASHIR HAI TAMAAMTAR HASTI
MERA KIRDAAR BATA HAI MUJH MEN
 
IK KHALAA SA HAI DIL SE ROOH TALAK
KUCHH TO 'MUMTAZ' MITA HAI MUJH MEN
*****************