NA JAANE KITNI BAATEN TUM SE KEHNA CHAAHTI HOON MAIN
 
 
NA JAANE KITNE ANDESHE TUMHARE DIL MEN BHI HONGE
 
 
TUMHARI DHADKANON MEN CHHUP KE REHNA CHAAHTI HOON MAIN
 
 
TUMHARI AANKH MEN BHI KHWAAB AB TAK TO YAHI HONGE
  
 
MAGAR AB WAQT BADLA HAI KAHAN WO RAAT DIN JAANAN
 
 
HAMARE DARMIYAA.N AB KITNI HI SADIYON KI DOORI HAI
 
 
NAI RAAHE.N, NAE MANZAR, NAYA HAI YE SAFAR JAANA.N
 
 
TO HASRAT KO NAYA IK PAIRHAN DENA ZAROORI HAI
 
 
ABHI BHI ZEHN PE MAANA TERI CHAAHAT KA DERA HAI
 
 
HAQEEQT HAI, TERI YAADEN MUJHE BECHAIN KARTI HAIN
 
 
MOHABBAT KI JAGAH LEKIN KHALA HAI AB MERE DIL MEN
 
 
NIGAAHEN TERI RAAHON KI TARAF JAANE SE DARTI HAIN
 
 
KHUDI NE DAAL RAKHE HAIN MERE JAZBAAT PE TAALE
 
 
ANAA NE DAAL RAKHI HAIN TERE PAAON MEN ZANJEEREN
 
 
MERI SAANSON KI LAY PAR AAJ WAHSHAT RAQS KARTI HAI
 
 
ABHI JAZBAAT HAIN BOJHAL ABHI ZAKHMEE HAIN TEHREEREN
 
 
 
HAQEEQT KE DORAAHE PAR KHDE HAIN AAJ HAM JAANA.N
 
 
TUMHARI RAAH WO HAI AUR MUJHE IS SIMT JAANA HAI
 
 
TUMHARI RAAH MEN SHAAYAD BAHAAREN RAQS KARTI HON
 
 
KHIZAA.N KI WAHSHATON MEN HAAN MAGAR MERA THIKAANA HAI
 
 
TAQAAZA MASLEHAT KA HAI KHUSHI SE HAM BICHHAD JAAEN
 
 
NA AB HAM YAAD RAKHEN AUR NA IK DOOJE KO YAAD AAEN
**********************************