KITNA LAMBA FAASLA HAI RATJAGON SE KHWAAB TAK
EK VEERAANA BICHHA HAI RATJAGON SE KHWAAB TAK
 
MASLEHAT TO BEKHATA THI ISHQ TO MAASOOM THA
BAAGHI LAMHON KI KHATA HAI RATJAGON SE KHWAAB TAK
 
ZULMATEN HI ZULMATEN HAIN IS SARAAB E ZAAT MEN
QAAFILA HAR IK LUTA HAI RATJAGON SE KHWAAB TAK
 
KHO GAI HAR EK AAHAT KHO GAI HAR IK UMMEED
SIRF SANNATA BACHA HAI RATJAGON SE KHWAAB TAK
 
WAHSHATON KI AAZMAAISH AARZOO'ON KA SARAAB
LAMHA LAMHA JAAGTA HAI RATJAGON SE KHWAAB TAK
 
DARD SE EHSAAS HOTA HAI KE ZINDA HOON ABHI
BEQARAARI KA MAZAA HAI RATJAGON SE KHWAAB TAK
 
DIL SE NAZRON TAK NAZAR SE ZULMATON KI RAAT TAK
US KO HI DIL DHOONDTA HAI RATJAGON SE KHWAAB TAK
 
DIL KI DHADKAN CHUP HUI AB DARD BHI KHAAMOSH HAI
KHAMUSHI KA SILSILA HAI RATJAGON SE KHWAAB TAK
 
JANG BHI 'MUMTAZ' JAZBON KI FATAH BHI MAAT BHI
JAANE KYA KYA HO GAYA HAI RATJAGON SE KHWAAB TAK
***********************