Meraa dil bhii shauq se todo ek tajurbaa aur sahii
laakh khilone tod chuke ho ek khilonaa aur sahii

raat hai Gham kii aaj bujhaa do jalataa huaa har ek chiraagh
dil men andheraa ho hii chukaa hai ghar men andheraa aur sahii

dam hai nikalataa hai ik aashiq kaa bhiid hai aa kar dekh to lo
laakh tamaashe dekhe honge ek nazaaraa aur sahii

khanjar le kar sochate kyaa ho qatl "Murad" bhii kar Daalo
daagh hain sau daaman pe tumhaare ek izaafaa aur sahii