غزل

ہوئیں کہاں مرے جذبوں کی آندھیاں خاموش
بدن میں چبھتی ہیں یادوں کی کرچیاں خاموش
تمام راستے خاموش ، بستیاں خاموش
جنوں کے دور میں رہتی ہیں سسکیاں خاموش
حسین عمر کا حصہ گزار دیتی ہیں
غریب باپ کی چوکھٹ پہ بیٹیاں خاموش
ہماری شاخوں پہ آکر پرندے بھی بیٹھیں
یہی تو کہتی ہیں پیڑوں کی ٹہنیاں خاموش
قدم سنبھال کے اس طرح رکھ زمین پہ تو
کہ جیسے چلتی ہیں پانی پہ کشتیاں خاموش
چلو اٹھو کہ مٹا دیں جہیز کی پرتھا
کہ اِس کے بھینٹ بھی چڑھتی ہیں لڑکیاں خاموش
جسے حقیر سمجھتا ہے جان لے مضطر
شکم کی بھوک مٹاتی ہیں روٹیاں خاموش

مرتضیٰ حسین مضطر

29/33, Jheel Road, Kashipur
Kolkata-700002
Mob: 9339805363 / 9007579268
بشکریہ ’’میر بھی ہم بھی‘‘	مرتب: مشتاق دربھنگوی
………………………