Pur shikastoN ki na chheRo daastaaN  is martabaa
BaiTh jaye ga yeh khastaa aasmaaN is martabaa

Dha chuki mera kharaabaa lekin ae reg E rawaaN
Itna Gham tu le ke jaye gi kahaaN is martabaa

Baat karna jurm hai  im-saal mere shahr meN
Aur zoroN par meri tab’ E rawaaN is martabaa

Kya khabar abke bhaNwar se hath nikle ya nahi
Dekhiye kya gul khilaye badbaaN is martabaa

Be salaaKh ab aik bhi khiRki nahi rah jayegi
Her taraf se uTh rahi haiN aaNdhiyaaN is martabaa

Wo dareechaa band hai pichhle baras aisa na tha
Door kitni ho gyee hai kahkashaaN is martabaa

Ae ‘Muzaffar’ jam’a hoNgai saari basti ke chiraaGh
Aag se bachnaa nahi koyii makaaN is martabaa
**********