* Fasaanaa chheRti hai shaam uska *
Fasaanaa chheRti hai shaam uska
Khalaa meN guNjtaa hai naam uska
Woh chauthi samt ho yaa saatvaaN dar
Chha-ti his ne liya hai naam uska
Musalsal ek sada koh E nidaa se
Mujhe milta raha paiGhaam uska
Lahu se aabyaari hum kareNge
Chaman meN gul khilaanaa kaam uska
Hamari be-gunaahi ne hameshaa
Sar aaNkhoN pe liya ilzaam uska
Meri aaNkhoN meN ek surat basi hai
Mere daaman meN hai in’aam uska
‘Muzaffar’ lafz milke sochte haiN
Chalo Gharat kareN aaraam uska
************** |