Dubo kar khoon meN lafzoN ko angaaray banaataa hooN
Phir angarooN ko daheka kar ghazal paaray banaataa hooN

ZamiN par hi rafooo ka dher sara kaam baqi hai
KhalaaoN say na kahe dena K saiyaaray  banaataa hooN

Mere hathoN ke chhalay phool ban jatay haiN kaghaz par
Meri aankhooN say poocho raat bhar taaray banaataa hooN

Jidhar maati uRaa dooN aftaab E taazaa paidaa ho
Abhi bachchoN main hoon saabun ke ghubbaaray banaataa hooN

Zamaanaa mujh se barham hai mera sar is liyee kham hai
K mandir ke kalas, masjid ke meenaaray banaataa hooN

Mere bachchay khaRe haiN balti le kar qataaroN meN
KuiaiN, taalaab, nahraiN aur fawwaaray banaataa hooN

Muzaffar waaqayi be dast-O-paa hooN maiN to kya Gham hai
Yeh kya kam hai ke mansoobay bahoot saaray banaataa hooN
************