مری تصویر پر کوئی کلر اچھا نہیں لگتا
کبھی بادل کے پردے میں قمر اچھا نہیں لگتا

ہماری گفتگو سے تربیت ہوتی ہے بچوں کی
سخن میں ہم کو طرزِ بے ہنر اچھا نہیں لگتا

تمہارے ہونے کا احساس گھر کو گھر بناتا ہے
جو تم گھر میں نہیں ہوتے تو گھر اچھا نہیں لگتا

خدایا اِس زمانے کو تو اک صف میں کھڑا کردے
بٹا اک ایک خانے میں بشر اچھا نہیں لگتا

وہی سر ہے جو خم ہو بارگاہِ ربِ عالم میں
جھکے بندے کے در پر جو وہ سر اچھا نہیں لگتا

کھلے موسم میں اُڑنے کا مزہ کچھ اور ہوتا ہے
حصارِ قید میں رہ کر تو پَر اچھا نہیں لگتا

ہمیں تو لطف آتا ہے رہِ دشوار میں نغمہؔ
فقط آسانیاں ہوں تو سفر اچھا نہیں لگتا
*************************