حمد باری تعالیٰ

تری مدحتوں سے سجی ہوئی تری کائنات ہے چار سو
کروں کیا بیاںمیں زبان سے تری شان جل جلا لہٗ

کوئی تیرے جیسا نہیں یہاں،تو ہی لم یزل تو ہی جاوداں 
نہیں کوئی تیرا شریک ہے تیری ذات پاک ہے وحدہٗ

جسے چاہے بخش دے زندگی جسے چاہے موت عطا کرے
تری حکمتیں تری قدرتیں، ہے ترا نظام ہی کو بہ کو

ہیں یہ دھوپ چھائوں یہ آب کیا، شب و روز کا حسیں باب کیا
تری قدرتوں کے گلاب ہیں ترے دم سے ان میں ہیں رنگ و بو

کوئی ادنیٰ اعلیٰ کرے کسے یہ بساط تیری رضا میں ہے
جسے چاہے کردے ذلیل تو جسے چاہے تو کرے سرخرو

تو شفیق باپ سے بڑھ کے ہے تری ممتا ماں سے عظیم ہے
جو بصد خشوع تھے ملتجی ہوئی پوری ان کی ہی آرزو

تو جلیل ہے تو قدیر ہے تو رحیم ہے تو کریم ہے
ہوئی نغمہؔ در پہ جو سرنگوں رکھی تونے سجدے کی آبرو
**********************************************