تمہارے عکس پہ سہرا سجا کے دیکھ لیا
کہ میں نے چاند کو دولہا بنا کے دیکھ لیا

تمام داغ نگاہوں میں اب بھی چبھتے ہیں
تمہارے چہرے کو نزدیک جاکے دیکھ لیا

تمام رات ستاروں سے ہم کلام رہی
تمام رات خودی کو جلاکے دیکھ لیا

مرے وجود میں سمٹی ہیں خواہشیں میری
طمانچہ وقت کا اک بار کھاکے دیکھ لیا

نظر میں ہو گئے روشن مسرتوں کے چراغ
جو اس نے میری طرف مسکراکے دیکھ لیا

ہزار بار ہوئی سنگسار میں نغمہؔ
کسی کی راہ کا پتھر ہٹا کے دیکھ لیا
********************