جس کے غم کی صدا میری آہوں میں ہے
ہر خوشی میری اس کی پناہوں میں ہے

منزلوں کا یقیں ہے مرا ہم قدم
رہنما سا کوئی میری راہوں میں ہے

پیرہن سے بھلے وہ فقیروں میں ہو
میری خاطر وہ دنیا کے شاہوں میں ہے

کوئی ناکام عاشق بتائے بھی کیا
کس کا کاجل ہے کس کی نگاہوں میں ہے

دھوپ ہی دھوپ ہے راستے میں بچھی
اور جلتی ہوا میری راہوں میں ہے

سوچتی ہوں کہ میں اُس کو کیا نام دوں
جس کی معصوم صورت نگاہوں میں ہے

اُس کی آہٹ ہے نغمہؔ کو گھیرے ہوئے
اُس کی آمد کی خوشبو ہوائوں میں ہے
**********************