ادھ کھلے جسم سے لپٹی ہوئی غربت دیکھی
میں نے بازار میں بکتی ہوئی عزت دیکھی

اپنی اولاد کو بھی بیچ رہے ہیں کچھ لوگ
بھوک اور پیاس کی اس دور میں قیمت دیکھی

آئینہ کوئی مرے سامنے جب بھی آیا
اپنی پیشانی پہ ابھری ہوئی کلفت دیکھی

ایسے بندے پہ مشیت کی نظر ہوتی ہے
جس نے ماں باپ کے قدموں تلے جنت دیکھی

تیری مرضی ترے جذبے کو سمجھنے کے لئے
میں نے ہر کام سے پہلے تری صورت دیکھی

کوئی مرجائے تو افسوس کیا کرتے ہیں
دنیا والوں میں ابھی اتنی محبت دیکھی

چاند کو ہاتھ میں لے کر ذرا کھیلوں نغمہؔ
دیکھنے کو تو بہت دہر کی ظلمت دیکھی
************************