ہیں یہی آج کل رونقِ زندگی
کاغذی پھول ہیں ، تتلیاں کاغذی

ہم نے کھولے دریچے ہوا کے لئے
سانحہ دیکھئے شمع ہی بجھ گئی

جلتے شعلوں کو رکھ دے گی وہ ہاتھ پر
آپ دنیا سے مانگیں اگر روشنی

بدلی بدلی سی ہے زندگی کی فضا
آدمی کی طرح اب کہاں آدمی

چشمِ پُرنم سے تم نے پڑھا تھا جسے
میری تنہائیوں کی وہ روداد تھی

میرے نغموں کو دیتے تھے جو نغمگی
اب کہاں ہیں وہ چنگ و ربابِ خوشی

قطرہ قطرہ اب آنکھوں سے بہتی ہوں میں
لمحہ لمحہ ستاتی ہے ماں کی کمی

چین حاصل ہو نغمہؔ مجھے کس طرح
غم رہا غم نہ اب ہے خوشی ہی خوشی
*************************