* ایسے مت روٹھ کہ ہر زخم ہرا ہوجائے *
ایسے مت روٹھ کہ ہر زخم ہرا ہوجائے
اور مرے واسطے ہر سانس سزا ہوجائے
لب پہ فریاد نہ ہو ، آہ نہ منہ سے نکلے
یوں مرا درد مرے ساتھ فنا ہوجائے
زندگی تلخ سہی ، زہر کی لذت بھی چکھوں
عین ممکن ہے مرا درد دوا ہوجائے
روح کی قید سے آزاد تو ہوسکتا ہے
غمِ دنیا سے کوئی کیسے رِہا ہوجائے
دل میں آئے جو تری یاد وہ بن جائے پیام
لب پہ ابھرے جو ترا ذکر دعا ہوجائے
کہکشاں پیار کی ہوجائے مرے زیرِ قدم
تیرے قدموں کی اگر خاک عطا ہوجائے
میں سنور جائوں تو یوں پیار سے دیکھو کہ ندیم
خوشبوئے زلف مری بوئے وفا ہوجائے
غازۂ غم سے سجاتی رہوں رخسارِ غزل
اور نغمہؔ وہ غزل بیش بہا ہوجائے
*********************** |