Ik haath duaoN ka asar kaaT raha hay,
hay chaoN me jis ki wo shajar kaaT raha hay...

kaTa tha safar maiN ne kabhi aik anokha,
ik umr sy ab mujh ko safar kaaT raha hay...

phaila hay bohat door talak mujh me bayabaaN,
dasta hay dareecha mujhy dar kaaT raha hay...

is shehr me raas aati nahiN aaeina saazi,
lijey wo mera dast-e-hunar kaaT raha hay...

ho jaye kahiN qad me na kal us k barabar,
is khof sy wo bhaai ka sar kaaT raha hay...

her aik sy aati hay bisaand apni gharaz ki,
dil kis k ravai'ay ka samar kaaT raha hay...